शिवपुत्र शंभू

छ्त्रपती श्री संभाजी महाराज

गडगडाट मेघांचा करीत आसमंत भरून आले

हिंदवी स्वराज्य रक्षिण्या शिवपुत्र शंभू झाले..

साकार ते स्वराज्य ज्यांच्या करी पूर्ण झाले

अश्या वाघराच्या पोटी छावा शंभूराजे जन्मले..

करीत रक्षण स्वराज्याचे शास्त्र सोबत रचिले

बुधभूषण नायिकाभेद अन किती ते दाखले..

युद्धनीती पारंगत लढवय्ये ते धुरंधर

किल्यांसोबत मिळीवला मुलुख समींदर..

पराक्रमी अंगी अन भाषांवरही अधिकार

बालपणीच ग्रंथ लिहिला होऊन शब्दांवर स्वार..

कोणाची टाप ती जो करेल नजरा वर

आदर्श असा राजा तो शुभ्र अवतार..

धन्य ही मायभूमी असे रत्न इथे जाहले

हिंदवी स्वराज्य रक्षिण्या शिवपुत्र शंभू झाले.

हिंदवी स्वराज्य रक्षिण्या शिवपुत्र शंभू झाले...

:- स्व, 

१४ मे, २०२०

पन्हाळगड, कोल्हापूर

रुळावरचं मरण

रुळावरचं मरण,

कोरोना व्हायरस मुळे जवळ जवळ दीड महिन्यांपासून मजूर राज्यातील विविध ठिकाणी अडकलेत. शुक्रवार दिनांक 7 मे ला रात्री औरंगाबाद येथील काही कामगार रेल्वे पकडण्यासाठी गावाकडे निघाले होते.

मात्र, यातील १६ कामगार पहाटे मालगाडी खाली आल्यानं त्यांचा दुर्दैवी मत्यू झाला...

Source Facebook

रुळावरचं मरण

मोलमजुरीचं जगणं आमचं

काय असणार स्वप्नं आमची?

दिवसागणिक भाकर तुकडा

ही एकच आशा जगण्याची..

ना पाहिलं भविष्य ना चिंता 

त्या उद्या येणाऱ्या दिवसाची.

आजच मरण उद्यावर ढकलत

घेऊन जगलो ढाल कष्टाची.

काम थांबलं रोजगार बुडाला 

पोटाची खळगी भरणार कशी?

गाव झाले बंद रस्ते रेल्वे बंद 

धरली घरची वाट मिळेलतशी.

करत पायपीट धुरळा तुडवीत

पडलो बाहेर  मुठीत घेऊन जीव,

पहाटेच्या अंधारात आला काळ

निसर्गालासुद्धा आली असेल कीव.

रुळावर विखरलो छिन्नविच्छिन्न 

सोबत भाकऱ्या अन घामाचं तूप,

मातीतलीच अहो माणसं आम्ही 

त्या मातीशीच झालो एकरूप.

रक्ताच्या थारोळ्यात पडलो 

शब्द सुद्धा नाही फुटला.

मदत मागायला अन जगायला

एकही अवयव नाही उरला.

मदत मागायला अन जगायला

एकही अवयव नाही उरला...Vj

:- स्व,

०९ मे, २०२०

कोल्हापूर.